4 hours wey don pass

Sea pirates don kidnap13 passengers along di Isaka waterways for Okrika local goment area of Rivers State, south-south Nigeria.

Di incident wey happun on Tuesday 6 May, 2025 involve students wey bin dey travel to write dia West African Examinations Council (Waec) exams.

Mama of one of di kidnap victims, Baktah Benjamin, say her son dey among di 13 passengers wey di sea pirates kidnap, wey also include seven teenage girls.

"Dis morning my son tell me say e dey go Bille and im and odas travel. Now dem call me say my son dey among di pipo di pirates kidnap. All of dem go write Waec.

Make goment come help us for Bille Kingdom. We no fit go our own village again? Dem kidnap dem along dis Isaka river. Dem never reach Bille or di open river bifor dem kidnap dem. Please, I dey beg goment to help rescue my son make notin happun to am. Na my only pikin," she tok.

Chairman of Bille Community for Port Harcourt, Peters Obene say na around afta 4pm on Wednesday 6 May na im e get information say sea pirates don kidnap a full boat load of 13 passengers wey bin dey travel from Port Harcourt to Bille to write di Waec exams.

E say di pipo wey identify dem say di pirates bin wear a local security uniform. (Tantita).

E kon plead wit goment and security agencies to help rescue all di victims so dem go fit write di Waec exams.

"We dey beg goment and di security agencies to take action to stop sea pirates from operating in our area."

Anoda Bille woman, Ibiada Okorite James dey also call on goment to help rescue di kidnap victims from di sea pirates, especially di seven teenage girls wey dey among dem wey also dey go write di Waec exams.

"We dey beg goment to help us secure dis Bille river becos e no dey secure again. We dey travel wit fear and e don too much becos just two weeks ago, dem collect anoda boat and kidnap di pipo inside and di community pay 30 million naira to release dem and now dem don come again. Make goment help us," she tok.

Gunmen bin don kidnap at least 16 pipo in two separate attacks along dat waterways.

Di first attack happun near di Borokiri axis of Port Harcourt wia pirates bin hijack a wooden cargo boat wey bin dey travel go Bonny for Bonny local goment area, and kidnap three out of di five passengers as dem leave one elderly man wit di boat driver.

Anoda boat piloted by di same captain wey dem bin don ambush im vessel some weeks ago, also suffer yet anoda attack near Isaka for Okrika local goment area.

On dis recent attacks by pirates, Odia Igbikiye-oyibo wey be di tok tok pesin of Ijaw Youth Council (IYC) for Bille, dey call on both di federal and state goments to approve local security wey go work wit security agencies to protect di waterways for di area.

"We dey call on goment to approve community police to work wit di security authorities wey dey dat areas. We get some security bodies, we know say dem dey work but e no dey easy to comb di whole river. So we dey ask di goment to approve community police to work wit di security agencies for dis territory so dat our waterways go dey peaceful and safe for all users.

Last month, di sea pirates hijack one boat and carry six passengers and di community struggle to pay ransom of about 30 million naira to secure dia release," e add.

Tok-tok pesin for Rivers State Police Command, SP Grace Iringe-Koko, say di Commissioner of Police don direct im tactical team and di officer in charge of Marine Police to intensify efforts to ensure di safe release of all di kidnap victims.