Nigeria boss Eric Chelle dey expect Europe top sides to show interest for Victor Osimhen afta di striker help fire Galatasaray win di Turkish title.

Di 26-year-old dey set to return to parent club Napoli afta e score 37 goals for 41 games during dis season loan spell wit di Istanbul giants.

E get one year remaining for im contract for Italy, but e dey expected to leave Napoli as e no dey part of coach Antonio Conte plans.

Wit im future undecided, Osimhen don dey left out of di Super Eagles squad for di international friendly away against Russia on Friday.

"Victor is, for me, di best striker for di world," Chelle tell BBC Sport Africa.

"For am e dey difficult to come for dis game becos e play a season wit a lot of pressure.

"Di reality na say transfer window dey. During dis time, a player like am no dey focused at 100%.

"I need to protect am physically and mentally, becos maybe e go [and get a transfer move].

"Maybe a club like Manchester United. Or maybe Chelsea, Barcelona or Real Madrid. So e need to dey focused on dat."

Osimhen, an Under-17 World Cup winner for 2015, na second on Nigeria all-time list of top scorers wit 26 goals.

E spearhead di Super Eagles attack for di 2023 Africa Cup of Nations, wia di West Africans finish as runners-up, and e dey crucial to bring back di hopes of reaching di 2026 Fifa World Cup.

Nigeria only pick up three points from dia first four matches wen Osimhen dey absent wit injury, but di striker score three goals wen e return for March as di Super Eagles secure a win ova Rwanda and a draw against Zimbabwe.

Chelle say e "neva see a competitor" like di former Wolfsburg and Lille front man.

"E wan win evritin during training. E crazy," Chelle, 47 tok.

"Wen di training session finish, e want to stay on di pitch and score again and again.

"I tink maybe even wen e sleep e wan score too."

Nigeria travel to Moscow afta winning di Unity Cup friendly tournament on Saturday.

Di Super Eagles overcome fierce local rivals Ghana 2-1 last Wednesday and den beat Jamaica 5-4 on penalties afta a 2-2 draw for di final.

Russia dey banned from competitive internationals following di invasion of Ukraine for February 2022, yet Chelle still expect a challenging encounter as e build towards di next round of 2026 World Cup qualifiers for September.

Dose games, at home against Rwanda and away for South Africa, go dey crucial as Nigeria look to bridge di six-point gap to Group C leaders Bafana Bafana.

"Russia na great nation of football," Chelle tok.

"Dem need to play some international games becos wit di war, e dey difficult for dem. Dem get lots of great players for dia league.

"I tink a lot of pipo go come to watch di game.

"Di reality na to work for September, for di next window for di World Cup qualifiers. Dis na our goal."